Մոտ 2-3 տարի հետո Երևանի 21 գերեզմանատների մեծ մասը մասնակի փակ կլինի։ Իսկ մոտ 15-20 տարի հետո մայրաքաղաքում հավանաբար այլևս բաց գերեզմանատուն չի էլ լինի։
Այսօր Երևանում գերեզմաններն ընդհանուր ավելի քան 500 հա տարածք են զբաղեցնում։ Տարիներ շարունակ այս ոլորտում բարձիթողի վիճակ է եղել։ Մարդիկ հուղարկավորության համար վերցրել են այնքան տարածք, որքան իրենց գրպանի պարունակությունն ու կապերն են թույլ տվել։
Վերջին տարիներին ոլորտում փոփոխություններ, խստացումներ են արվել։ Երևանում օրական միջինը 15-20 հուղարկավորություն է արվում, իսկ տարածքն անսահմանափակ չէ։
Խնդրի լուծումը պատասխանատուները տեսնում են դիակիզարան կառուցելու մեջ։ Օրենքն ընդունված է, բայց արդեն գրեթե 20 տարի է՝ այն կյանքի կոչելու հարցում պետությունը հապաղում է։ Եկեղեցին դեմ է դիակիզմանը։
