Ֆրանսիայի նախագահ Էմանյուել Մակրոնի Չինաստան այցի ընթացքում 15 միլիարդ դոլարի պայմանագիր է ստորագրվել: Այսօր ստորագրման արարողությանը ներկա են գտնվել երկու երկրների նախագահները: Չինաստանի կառավարության պաշտոնյաները հայտնել են, որ համագործակցությունը վերաբերում է տիեզերական, էներգետիկ և գյուղատնտեսության ոլորտներին, մասնավորապես՝ ֆրանսիական 20 ընկերություններ իրավունք ստացան մսամթերք արտահանել Չինաստան:
Ֆրանսիայի նախագահի պաշտոնում սա Էմանյուել Մակրոնի երկրորդ այցն է Չինաստան:
Էմանյուել Մակրոնն ու Սի Ծինփինը այսօր նաև հանդես են եկել համատեղ հայտարարությամբ՝ վերահաստատելով իրենց հավատարմությունը գլոբալ ջերմացման դեմ պայքարի Փարիզի հռչակագրին: 2015 թվականին Փարիզում ստորագրված այդ փաստաթուղթը ԱՄՆ-ի նախագահ Դոնալդ Թրամփը քննադատել էր ու շուտով Միացյալ Նահանգները պատրաստվում է դուրս գալ Փարիզի հռչակագրից:
