ՀՀ վարչապետ Նիկոլ Փաշինյանը քիչ առաջ ժամանեց Վրաստանի Հանրապետություն։ Վարչապետի այցը պաշտոնական է, կտեւի մարտի 3-4-ը։
«Թբիլիսիի «Շոթա Ռուսթավելի» միջազգային օդանավակայանում վարչապետ Նիկոլ Փաշինյանին դիմավորեցին Վրաստանում ՀՀ արտակարգ և լիազոր դեսպան Ռուբեն Սադոյանը, Վրաստանի արտաքին գործերի նախարար Դավիթ Զալկալիանին, ՀՀ-ում Վրաստանի դեսպան Գիորգի Սագանելիձեն։
Նշենք, որ սա վարչապետ Նիկոլ Փաշինյանի երրորդ այցն է Վրաստան։
Այցի շրջանակում վարչապետը հանդիպումներ կունենա Վրաստանի վարչապետ Գիորգի Գախարիայի, նախագահ Սալոմե Զուրաբիշվիլիի, խորհրդարանի նախագահ Արչիլ Թալակվաձեի և Համայն Վրաստանի Կաթողիկոս-Պատրիարք Իլյա Երկրորդի հետ։ Վրաստանի Կառավարության հետ հանդիպումից հետո կողմերը ԶԼՄ-ների համար հայտարարությամբ հանդես կգան։
Վարչապետ Նիկոլ Փաշինյանը կայցելի նաև Թբիլիսիի «Հերոսների» պուրակ. նա ծաղիկներ կդնի հուշակոթողին և հարգանքի տուրք կմատուցի։ Նախատեսված է նաև հանդիպում Վրաստանի հայ համայնքի հետ։ Հայկական պատվիրակության կազմում են արտգործնախարար Զոհրաբ Մնացականյանը, խորհրդարանի փոխխոսնակ Լենա Նազարյանը, Տարածքային կառավարման և ենթակառուցվածքների նախարար Սուրեն Պապիկյանը, Կրթության, գիտության, մշակույթի և սպորտի նախարար Արայիկ Հարությունյանը, Բարձր տեխնոլոգիական արդյունաբերության նախարար Հակոբ Արշակյանը և այլք։
