ՀՀ-ում դիվանագիտական և հյուպատոսական ներկայացուցչություններին պատկանող մեքենաները հնարավոր է վարել մգեցված ապակիներով, հայտնում է Հայաստանի ՆԳՆ մամուլի ծառայությունը՝ ի պատասխան Sputnik Արմենիայի գրավոր հարցման։
Ավելի վաղ նկատել էինք, որ Հայաստանում գործող դեսպանատների ու դիվանագիտական ներկայացուցչությունների մեքենաները երթեւեկում են մգեցված ապակիներով, որոնք ակնհայտորեն գերազանցում են թույլատրելի նորմը։ ՆԳՆ-ից հետաքրքրվեցինք՝ արտոնություններ տրվե՞լ են։
Գերատեսչությունից պատասխանել են, որ տրանսպորտային միջոցների ապակիների լույսի թափանցելիության թույլատրելի աստիճանը սահմանվում է «Անիվային տրանսպորտային միջոցների անվտանգության մասին» Մաքսային միության տեխնիկական կանոնակարգով։
«Համաձայն նշված փաստաթղթի ենթակետերից մեկի՝ տեխնիկական կանոնակարգը չի տարածվում դիվանագիտական և հյուպատոսական ներկայացուցչությունների, միջազգային (միջպետական) կազմակերպությունների վրա (որոնք օգտվում են արտոնություններից և անձեռնմխելիությունից՝ միջազգային իրավունքի ընդհանուր ճանաչված սկզբունքներին և նորմերին համապատասխան). ինչ վերաբերում է նշված ներկայացուցչությունների (կազմակերպությունների) աշխատակիցներին և նրանց ընտանիքի անդամներին պատկանող տրանսպորտային միջոցներին»,- ասված է հաղորդագրության մեջ։
Միաժամանակ ՆԳՆ-ն հայտնել է, որ Հայաստանի բարձրաստիճան պաշտոնյաները և նրանց ուղեկցող մեքենաները նման արտոնություն չունեն։
Հիշեցնենք, որ Հայաստանում սահմանված նորմը գերազանցող մգեցված ապակիների համար տուգանք կիրառելու որոշումն ուժի մեջ է մտել 2023 թվականի հունիսի 1-ից։ Թեև մգեցված ապակիներով մեքենա վարելը հանրապետության օրենսդրությամբ շատ ավելի վաղ արգելված էր, սակայն տուգանքներ չէին կիրառվում, քանի որ ոստիկանությունը հագեցած չէր մթության աստիճանը չափող սարքերով (տաումետրերով):
Նյութի աղբյուր` armeniasputnik.am
